Aus: Elfriede Bidmon: "Aamol Christkindla saa!"

Die Geburt im Stall

 

"Schau Maria!"

sacht dä Josef und deit mit sein Arm.

"Glei dort vonna is dä Stall und drinna is warm."

Di Maria is mäid, sie gspiert unter Schmerzn,

äs Kindla mecht kumma, wous trecht unterm Herzn.

Im Stall touts gnouch Hei und Strouh drinna geem,

di Maria toutsi dankboar draf niedälegn.

Dä Josef sicht hint in dä Eckn an Oxn.

Fiers Eserla is aanu Platz in der Boxn.

"Maria", jammert dä Josef, "wos sollin tou,

wenn du etz af di Welt bringst unsern klan Bou?

Ii waß blouß, di Fraua genga ins Kreiskranknhaus,

derham kummäs mit an kocherdn Wassä aa aus."

"Ach Josef", seifzt di Maria, "wos jammerstn su.

Ma kennt ja ball maana, unsä Kindla gräischst du.

Tous Krippla mit Hei und mit Strouh aasleeng,

dass unsä Kind drin lieing koo warm und bequem."

Und gecher Mittänachtlicht werkli äs Kindla drinna,

straplt vägnäicht, stroahlt su richti vo inna.

Und dä Josef is immä nu ganz benumma,

dassäs Kind goar su schnell af die Welt is kumma,

waß vur Freid kaum mäiä ei und aus,

kummt asn Stauna ball nemma raus.

"Schau nä Maria, su vullaä Leem!

Hast du scho amol su a Kindla gsehng?

Wäi aafgweckt schi seini blaua Ailgi blitzn,

as di goldin Lockn di Ouherli spitzn,

äs Neesla, äs Geschla und di Fingerli su klaa.

Und des werd amol unsäHerr, unsä Heiland saa,

dä uns erlöst vo unsri Sindn

und uns in Himmel werd väkindn?

Äs herzi Kindla, mei Godd, halleeluja!"

Und wäi Maria und Josef leis singa denna,

werd äs Kindla mäid, touts nou herzhaft gähna.

Schäi langsam falln nän di Aigli zou,

und dä Stall licht dou in täifä Rouh.

Und dä Ox und dä Esl, däi zwaa aldn,

denna mit ihrm Schnaufm äs Kind warmhaltn.